Pertsona bat hil da eta beste bi erreskatatu dituzte Artazul sakanean

Nafarroako Suhiltzaileek Twitter bidez baieztatu dutenez, pertsona bat hil da eta beste bi erreskatatu dituzte Artazul sakanean, Artetaren iturburuan, Nafarroan.

Barrankismoa egin ohi den inguru horretan hiru pertsona harrapatuta zeudela zioen abisua 14:30 aldera jaso dute Nafarroako Larrialdi zerbitzuek. Abisu horretan pertsonetako bat itota egon zitekeela ohartarazi dute. Hildakoa Guadalajarako 53 urteko gizonezkoa da, eta itota zendu da. Bestalde, erreskatatu dituzten beste bi pertsonak 38 eta 42 urteko bi nafar dira, eta Nafarroako Ospitalegunera eraman dituzte hipotermia sintomak zituztela.

Erreskatea oso "nekeza eta arriskutsua" izan da, azken egunotako euriak eta elurrak eragindako ur-emari handiagatik.

Guardia Zibilaren mendiko erreskate taldeko kideak, helikoptero medikalizatua, Suhiltzaileen urpekari zerbitzuetako kideak eta Polizia Forala aritu dira lanean.