Gipuzkoako Elizbarrutian milioi bat euroko galerak eragitea leporatu diote Munillari

Beste polemika batek astindu du egunotan Gipuzkoako Eliza.  Jose Ignacio Munilla gotzainak Donostiako Elizbarrutian milioi bat euroko galerak eragin dituela salatu du kristau talde batek.

Manifestu bat kaleratu dute 'Elizbarrutiari bizkarra emanda ez'  izenburupean, eta bertan jasotzen denez, milioi bat euro baino gehiagoko zuloa egin du Munillak; 700.000 euro Banco Popularreko baloreetan galdu dira, eta beste 500.000 euro Elizaren ondasunen mantenuan.

Agiriaren sinatzaileek diote Bikario Nagusiak azkeneko Kontseilu Prebiterialean onartu zuela milioi bateko zuloa.

Orain, salatzaileen arabera, "ondasunak berregituratzeko asmoa" agertu du Elizbarrutiak, "zuloa estaltzeko".

Diru-kontuei buruzko "gardenatsun eza" salatu dute manifestua izenpetu dutenek. Horien arabera, "urteak" daramatze galerekin, baina Elizbarrutiak ez du "egoeraren balantze gardena" erakusten.

Hori dela eta, egoera argitzeko, "kanpoko ikuskaritza bat" eskatu dute. Elizbarrutiak saltzera atera omen dituen ondasunen inguruko informazio gardena ere eskatu dute.

Elizbarrutiak ukatu egin ditu salaketak

Donostiako Elizbarrutiak goitik behera ukatu ditu salaketok, eta agiri batean nabarmendu duenez,  "profesionaltasunez, zuhurtziaz eta gardentasunez" lan egiten du erakundeak.

Diru-kontuen berri urtero ematen dutela esan du Elizbarrutiak, eta  bere "kudeaketa ekonomikoa" defendatu du, Elizako Ekonomia Kontseiluak gainbegiratzen dituela argudiatuta.