Gizartea -

'La Manada'ren aurkako epaia

Catalá, Ricardo Gonzalez epaileari buruz: 'Jakina da arazo berezi bat duela'

Espainiako Justizia ministroaren ustez, Botere Judizialaren Kontseilu Nagusiak “lehenago jardun behar zuen” Ricardo Gonzalez 'La Manada'ren aurkako epaian kontrako botoa eman zuen epailearen aurka.

Catalaren hitzetan, CGPJk "lehenago" egin behar zuen epailearen aurka. Argazkia: Efe.
Rafael Catala Espainiako Justizia ministroaren argzkia
Rafael Catalá ministroaren hitzek botere judiziala haserretu dute

1:26

Agentziak | Erredakzioa

Whatsapp Facebook Twitter Telegram Email

Rafael Catala Espainiako Gobernuko Justizia ministroak gaur, astelehenarekin, adierazi duenez, CGPJ Botere Judizialaren Kontseilu Nagusiak “lehenago jardun behar zuen” Ricardo Gonzalez 'La Manada'ren aurkako epaian kontrako botoa eman zuen epailearen kontra, “jakina baita arazo berezi bat duela”.

Cope irrati katean egindako adierazpenetan azaldu duenaren arabera, CGPJren eginbeharra da bere boto partikularrean 'La Manada'ko bost kideak aske uztearen alde egin zuen magistratuak “bere lana egiteko ahalmen nahikoa ote duen zaintzea”.

“Hainbat espediente zabalik”

Justizia ministroak esan du berak ez duela isunez hitz egin, “baina harrigarria da Kontseiluak ezer ez egitea jakina denean epaile honek arazo berezi bat duela”.

Catalak ez du azaldu arazo berezi hori zein den, eta baieztatu du Ricardo Gonzalez magistratuak “hainbat espediente dituela zabalik dagoeneko”.

Halaber, Catala harrituta agertu da berak epaiari ('La Manada'ko kide bakoitzari bederatzi urteko espetxealdia ezarri diote, sexu abusua, eta ez sexu erasoa, egotzita) egindako kritiken aurrean hainbat magistratu eta fiskalek izan duten erreakzioarekin.

Catalaren esanetan, Gonzalez magistratuaren testuak “boto partikular bati ez dagozkion adierazpen eta pentsakizunak jasotzen ditu”, eta esan du indarkeriaren eta larderiaren arteko muga “oso soila” dela eta “horrek egunotan ikusi ditugunak bezalako emaitzak” ekar ditzakeela.

“Desorekak badaude, legeak egin behar da”

Ministroak “legeak errealitateari egokitzearen” aldekoa dela esan du, eta gehitu du “desorekak badaude, kasu honetan ikusi den bezala”, legeak egin behar direla.

Hori guztia dela eta, Justizia Ministerioko adituei eskatu die legea aldatu behar duen aztertzea eta balioztatzea, eta talde politikoei erreforma hori egin behar ote den erabakitzea.

“Catalaren dimisioa”

Justizia ministroaren adierazpenen aurrean, AMP Magistraturako Elkarte Profesionalak, Demokraziaren aldeko Epaileek, Forum Judizial Independenteak, Francisco de Vitoria elkarteak, Fiskalen Elkarteak, Fiskalen Batasun Aurrerakoiak eta Fiskalen Elkarte Profesional Independenteak ohar bat sinatu dute, salatzeko Justizia ministroaren hitzek magistratuaren ahalmenaren gaineko zalantzak zabaldu dituela.

“Ausarkeria da Justizia ministro gisa jarduten duen pertsona baten aldetik Botere Judizialaren Kontseilu Nagusiari soilik dagozkion zereginetan botere exekutiboa sartzea eta magistratu baten gaitasunaren edo gaitasunik ezaren inguruko iruzkinak egitea”, dio idatziak.

Idatziak dioenez, “benetako arriskua” da Exekutiboak ebazpen judizialak eta “asmo jakin batez sortutako nahasmena” hauteskundekeriaz erabiltzea, Estatuaren botere baten kide gisa dagokiona, “erakundeen funtzionamendua zaintzea” egin beharrean.

Hau zure interesekoa bada, baliteke beste gai hauek ere izatea
Iruñeko albisteak Indarkeria matxista Espainiako Gobernua albisteak Epaiketak argazkiak Gizartea ‘La Manada’ auzia gaur BJKN gaur