Gizartea -
EZBEHARRA
Gizon bat larri zauritu da Izaban, zuhaitz bat gainera erorita
Urdulizko 50 urteko bizilaguna da biktima. Leioako Askartza ikastetxeko ikasleentzako udako kanpaleku bat prestatzen ari zen, zuhaitza gainera erori zaionean.
AGENTZIAK | ERREDAKZIOA
50 urteko gizon bat larri zauritu da gaur goizean Belabartzen (Izaba), zuhaitz bat gainera erorita.
SOS Nafarroako larrialdietan, 08:54an jaso dute abisua. Antza, buruan jo du zuhaitzak, eta ez da azpian harrapatuta geratu, baina konortea galdu du.
Izabako guardiako medikuak artatu du hasiera batean, baina helikopteroz eraman dute ospitalera gero, buruko traumatismo larria baitzuen.
Zauritua 50 urteko Urdulizko bizilaguna da. Leioako Askartza ikastetxeko ikasleentzako udako kanpaleku bat prestatzen ari zen, beste pertsona batzuekin batera, zuhaitza gainera erori zaionean.
Istripua gertatu denean, eguraldi ona zegoen eta ez zebilen haizerik. Zangozako polizia-etxeko foruzainek ikerketa abiatu dute gertatutakoa argitzeko.