Gizartea -
NAFARROA
10 urteko haur bat ospitaleratu dute Tuteran, kalamua erre ostean
Konortea erdi galduta zuenez eta oka egin zuenez, anbulantzian eraman zuten. Arguedasen gertatu zen, eta dagoeneko senda-agiria eman diote. Foruzaingoak ikerketa abiatu du.
AGENTZIA | ERREDAKZIOA
Kalamu porru bat erre zuen 10 urteko mutiko bat ospitaleratu dute aste honetan Tuterako ospitalean, Nafarroako Foruzaingoak ostiral honetan jakinarazi duenez. Dagoeneko eman diote senda-agiria, baina Nafarroako Foruzaingoa gertatutakoa ikertzen ari da.
Ikertzen ari diren gertaerak asteazkenean izan ziren, Arguedasko Done Mikel plazan. Hasiera batean, Valtierrako medikuek artatu zuten haurra, eta intoxikatuta zegoela baieztatu zuten.
Konortea erdi galduta zuenez eta oka egin zuenez, anbulantzian eraman zuten Tuterako ospitalera.
Senda-agiria jaso ostean haurrak berak agenteei azaldu zienez, heldu batek eman zion droga. Gerora, ordea, porrua lurrean aurkitu zuela esan zien.
Mutikoaren gurasoak eta herriko gizarte zerbitzuak jakinaren gainean jarri dituzte. Foruzaingoak, berriz, ikerketa abiatu du gertatutakoa argitzeko.