Gizartea -

EUSKARA

Azken lau egunak Araban igaro ostean, 'EuskarAbentura' Gipuzkoan sartuko da

Eguraldi txarra eta espedizioko kide batzuen ondoeza tarteko, autobusez egingo dute Agurain eta Zerain arteko bidea.

'EuskarAbentura' espedizioko kideak Agurainen. Argazkia. EuskarAbentura
'EuskarAbentura' espedizioko kideak Agurainen. Argazkia. EuskarAbentura
'EuskarAbentura' espedizioko kideak Agurainen. Argazkia. EuskarAbentura

EITB.EUS

Whatsapp Facebook Twitter Telegram Email

'EuskarAbentura' espedizioa Gipuzkoa sartu da astelehen honetan, lau egunez Araban ibili ostean. Gaurko etapa (Agurain - Zerain) autobusez egingo dute, eguraldi txarra eta espediziokide batzuek asteburuan izandako ondoeza tarteko. Datozen lau egunak Gipuzkoako egingo dituzte jzioquitarrek (parte-hartzaileek), eta besteak beste ondorengo herrietan egingo dituzte geldialdiak: Zerain, Tolosa, Hernani eta Irun. Dagoeneko 210 kilometroko bidea egin dute Ipar Euskal Herria, Nafarroa eta Araba zeharkatuz, eta Getxoko Bizkaia zubian izango dute helmuga uztailaren 31n.

Azken lau egunetan Araba zeharkatu dute. Uztailaren 12an, Nafarroa atzean utzi eta Arabako lurretan sartu aurretik, parte-hartzaileek Donemiliaga Kukulako Yuso eta Susoko Monasterioak ikusi eta bertako glosak ezagutu zituzten, euskaraz idatzitako lehenak. Arratsaldean, behin Araban sartuta, Gesaltza Añanan egin zuten geldialdia eta bertako gatz harana bisitatu zuten. Iluntzean, ostera, astronomia tailerra eta gero vivac-a egin zuten igerilekuan. Egunsentiarekin batera, ostera, ekaitzak jo zuen eta euriak kideak esnarazi zituen.

Ostiralean, Argantzunen, Trebiñuko errealitatea ezagutu zuten Ikastolako Ekaitz Lotina eta Saioa Urizarren eskutik. Gauean, En Tol Sarmiento - E.T.S. - musika taldeko Iñigo Etxezarretaren bisita sorpresa izan zuten.

Gasteiz izan zen larunbateko etaparen helmuga. Armentia ingurutik hirira sartu eta autobusez Gamarrako igerilekuetara iritsi ziren, bertan senitarteko eta lagunekin egoteko tartea izan zuten. Arratsaldean, Aroa Arrizubieta eta Manu Bendala bertsolariek bertso bisita gidatua eskaini zuten hiriko Alde Zaharrean barrena.

Asteburuan parte-hartzaile batzuk ondoezik sentitu dira (gorakoa eta beherakoa, kasu). Dena den, antolatzaileen esanetan, dagoeneko taldekide guztiak osatu dira.

Igandean, trenez egin zuen etapa espedizioak, Gasteiztik Aguraineraino. Bertan, Ane Pedruzok eta Beñat Garaiok Arabako errealitate soziolinguistikoaren berri eman zieten. Ondoren, Iñaki Viñaspre bertsolariak giroa berotu zuen. Bazkalostean, berriz, Badaiotz sokatira taldeko Ruth Linazak eta Garbiñe Lopez de Uraldek sokatiraren gakoak erakutsi zizkieten gazteei, eta hainbat tiraldi ere egin zituzten.

Gaur, Agurain eta Zerain arteko bidea egin behar zuten oinez. Hala ere, eguraldi iragarpen txarra eta asteburuko gaixotasunak kontuan hartuta, Zeraineraino autobusean joatea erabaki du antolakuntza taldeak. Goizeko lehen orduan, kide batzuk Agurain inguruan kokatutako Sorginetxe trikuharria ezagutzera joan dira. Beste batzuek, ordea, goiza lo egiteko eta deskantsatzeko aprobetxatu dute.

Hurrengo lau egunetan Gipuzkoa zeharkatuko du 130 lagunez osatutako espedizioak. Zerain, Tolosa, Hernani eta Irun izango dira hurrengo helmugak eta lotarako lekuak.

Hau zure interesekoa bada, baliteke beste gai hauek ere izatea
Euskaraz Gipuzkoako albisteak Araba Gizartea bideoak Albisteak Gaur Agurain argazkiak Eguneko albisteak EuskarAbentura Espedizioa azken ordukoa Gazteak gaur