Kontxako badian kutsadura fekala izan dela salatu du Eguzkik

Eguzki talde ekologistak salatu duenez, Donostiako badian "kutsadura fekal kasu berri bat" izan zen atzo, irailaren 11n. Arrazoi horrengatik, betiere talde horren arabera, bainua galarazita (bandera gorria) egon zen Kontxako eta Ondarretako hondartzetako hainbat gunetan.

Taldeak ohar baten bidez jakinarazi duenez, "16:30 aldera, bandera gorriak zeuden tenis inguruan eta Loretopean (Ondarreta) eta Kontxako hondartzara jaisteko maldaren eremuan. Bandera horia jarri zuten Ondarretako eta Kontxako erdigunea". Antza, Gurutze Gorriak Ondarretan duen postuan kartel txiki bat jarri zuten: "Ur zikina. Ez bainatu 10 minutu baino gehiago eta gero berehala dutxatu". Taldeko kideek "emakume bat ikusi zuten uretan laginak hartzen".

Eguzkik salatu du "kutsadura kasu hauek isiltasun informatiboaren alfonbrapean" gorde dituztela, eta dei egin die udal ordezkariei: "Herritarren osasunari zein segurtasunari zor dioten errespetuagatik, arazo honen arrazoia aurkitu behar dute, eta herritarrei zergatia argi eta garaiz jakinarazi behar diete".

Taldeak emandako datuen arabera, kutsadura kasu hauek "2016az geroztik gertatzen ari dira". Urte horretan, bost kasu atzeman zituzten; iaz, "beste hainbat"; eta aurten, Eguzkiren esanetan, "gutxienez hiru egon dira". Uztailaren bigarren astean, esaterako, debekatuta egon zen bainua hartzea Loretopeko gunean, E. coli bakterioak baimendutako maila gainditu baitzuen. Eguzkiren aburuz, "kutsadura kasu hauek behin eta berriz errepikatzea oso kezkagarria da, are gehiago arrazoi meteorologikoekin (euriteak) loturarik ez duenean, oraingoan bezala".