Gizartea -
Harrapaketa
Iruñean ume bat harrapatu eta hil zuen emakumea, aske
Zuhurtziagabekeriazko giza hilketaren delitu batengatik ikertzen ari dira. Gidabaimena kendu dio epaileak, eta Espainiar estatutik irteteko debekua jarri dio.
Agentziak | Erredakzioa
Aske utzi dute astelehenean 4 urteko mutiko bat harrapatu eta hil zuen emakumea, Iruñean. Zuhurtziagabekeriazko giza hilketaren delitua egin duten ikertzen ari dira.
Epaileak gidabaimena kendu dio behin behinean, eta Espainiar estatutik irteteko debekua ezarri dio, Nafarroako Auzitegi Nagusiak informatu duenez.
Astelehenean izan zen istripua, Atarrabiako etorbidean, Jesusen Bihotzaren mirabeen eskola parean.
Samina eta protestak Nafarroako hiriburuan
I.G.C. Antsoaingo 4 urteko mutila Jesusen Bihotzaren mirabeen eskolatik atera zen aitarekin, eta biak zebra-bidea gurutzatzen ari zirela, auto batek adingabea harrapatu zuen astelehen arratsaldean. Bizirik heldu zen ospitalera, baina bertan hil zen.
Goizean, eskolara sartzeko orduan, jende ugari bildu da harrapaketa izan zen lekuan, eta errepidea itxi behar izan dute. Udaltzaingoko agenteek zirkulazioa bideratu dute.
