Emakumeen Mundu Martxa itxi dute Bilbon, 'Feministon Herria' egunarekin

Emakumeen Mundu Martxa mugimendu feministaren XI. nazioarteko topaketa itxi dute larunbatean Bilbo, 'Feministon Herria' egunarekin. Hori dela eta, 40 herrialdetako 130 emakume bildu dira Bizkaiko hiriburuan, xede izanik "alternatiba feministak erakustea eta guztion indarrak batzea", eta bi urte barru izango den "V. nazioarteko ekintza" prestatzen joatea.

Ekitaldiz beteriko programa prestatu dute: gosari feminista izan da 10:00etan; Mundu Martxako kideen arteko solasaldia izan da ordubete beranduago eta, jarraian, mahaingurua egin dute, 'Bakea feminismotik abiatuta' lelopean. 15:00etan herri-bazkaria egin dute, eta egunaren ekitaldi garrantzitsuena 17:00etan Arriaga Antzokitik abiatu den manifestazioa izan da. Geroago, 19:00etan, musika emanaldiak izan dira, Mice, Sustraians, Ni Tuya Ni Yuta, Gora Etorri musika-taldeekin, hain zuzen ere.

Asteburuko agenda feministari dagokionez, Donostiak eta Iruñak bat egin dute Bilboko mobilizazioarekin, eta euren martxak ere egingo dituzte: Donostiak, erraustegiaren proiektuaren kontra; Iruñak, berriz, euskararen ofizialtasunaren aldekoa.

Bilbo, topaketa ixteko egoitza

Deialdiaren antolatzaileek azaldu dutenez, 2016an Mozambiken egindako hitzordu batean proposatu zuten bilera Euskal Herrian egitea, mugimendu feministak bertan indarra duela iritzita. Gainera, "martxak Euskal Herrian duen izaera herrikoia" ere hartu zuten kontuan; izan ere, mugimendu askorekin loturak sortzeko duen gaitasuna erakutsi du urte askotan.