Zumaiako Flyschean salatutako plastiko isuria ikertuko du Arartekoak

Deba eta Zumaia arteko Flyschean dagoen plastiko isuria "saihesteko eta horri konponbidea emateko" ikerketa abiatu du Manuel Lezertua arartekoak.

Ohar baten bidez, Arartekoak azaldu du Oier Bartolome surflariak internetera igotako bideoa ikusi ostean hartu duela ikerketa martxan jartzeko erabakia. Zumaia eta Deba artean hondakin pilaketa zegoela salatu zuen Bartolomek.

Gipuzkoako Foru Aldundia, bere aldetik, atsekabetuta agertu da bertan gertatutakoagatik, eta horixe da, hain zuzen, Ingurumen eta Turismo zuzendaritzen bitartez adierazi duena.

Bestalde, Arartekoak gogora ekarri du euskal kostaldeko geoparkearen kudeaketarako Zumaiako, Debako eta Mutrikuko udalek sortutako Geogarapen elkartearen salaketa. Horren arabera, "ohikoa" da itsasertz horretan zaborrak aurkitzea.

Arazo horren aurrean, Arartekoak nabarmendu du "orain arte izandako plastiko isurien edo antzeko hondakin solidoen pilaketari" buruzko informazioa jasotzen ari dela.