Gizartea -
Indarkeria matxista
Gizon bat atxilotu dute Gasteizen bikotekideari eraso egiteagatik
Emakumeak zauria zuen sudurrean, eta ubelduak besoetako batean. Alde Zaharreko etxebizitza batean jazo zen erasoa.
Agentziak | Erredakzioa
Gasteizko Udaltzaingoak 37 urteko gizonezko bat atxilotu zuen atzo Alde Zaharreko etxebizitza batean bikotekidea kolpatzea egotzita, Polizia horretako iturriek gaur jakinarazi dutenez.
Gertakariak 05:30ean jazo ziren. Zaintza lanetan zebilen patruila bati jakinarazi zioten Alde Zaharreko kale batean eraso matxista bat gertatzen ari zela. Hara heltzean, hutsik topatu zuten kalea, baina oihuak entzun zituzten etxebizitza batean.
Gizona etxetik aterarazi, eta lehendabizi emakumearekin hitz egin zuten agenteek. Hark kontatu zienez, eztabaida izan zuen bikotekidearekin. Biktimak zauria zuen sudurrean, eta ubelduak besoetako batean.
Bikotearen eta lekuko baten kontakizuna entzun ondoren, gizona atxilotu zuten udaltzainek, genero indarkeriaren delitua egotzita.
_______________________________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.
