Gizartea -
Garraioa
Metro Bilbaok errekor berria ezarri du San Tomas egunean, 407.000 bidaiarirekin
Jende gehien izandako geltokia Zazpikaleak izan da, 60.046 bidaiarekin. Aurreko errekorra 386.228 bidaiakoa zen.
eitb.eus
Metro Bilbaok bidaia kopuruaren marka berria ezarri du San Tomas egunean: 407.639. Aurreko errekorra 2014ko San Tomas egunekoa zen: 386.227 bidaia.
Datu berriarekin, lehenengo aldiz igaro du Bilboko metroak 400.000 bidaiarien langa.
San Tomas azokak jende andana erakarri zuen Bizkaiko hiriburura, eta gehienek metroa hautatu zuten mugitzeko. Izan ere, jende gehien hartutako geltokiak jai-eremutik gertuen daudenak izan dira: Zazpikaleak (60.046 bidaiari) eta Abando (30.207), bereziki, eta baita Moyua (26.886) eta Indautxu (25.466) ere. Barakaldo, Gurutzeta eta Areeta izan dira Bilbotik kanpo dauden geltoki jendetsuenak.
13:00ak eta 15:00ak artean izan da bidaia gehien ikusi dituen tartea. Bi orduko tarte horretan 65.503 balioztapen izan ziren metro sare osoan. 11:00ak eta 13:0ak artean 53.756 izan ziren.
Metro Bilbaok zabaldu duenez, San Tomas egunean zehar ez da arazorik izan.
