Pertsona bat desagertuta dago Artaitzen haren etxeak su hartu ostean

Artaizko (Untzitibar, Nafarroa) bizilagun bat desagertuta dago haren etxeak su hartu ostean, Nafarroako Gobernuak eitb.eus-i jakinarazi dioenez. Sugarrek kalte handiak egin dituzte eraikinean, eta suhiltzaileak ezin izan dira bertara sartu. Hala, ez dakite maizterra barruan zegoen sutea gertatu denean.

Nafarroako Gobernuko iturrien arabera, larrialdietarako zerbitzuek gauerdian izan dute gertakariaren berri. Suhiltzaileak heldu direnerako, garrek eraikinaren zati handi bat hartuta zuten, eta sabaiaren parte bat behera etorrita zegoen. Lehen hipotesien arabera, etxebizitzaren sotoan dagoen galdararen erregai-tangan hasi da sutea.

Cordovillako, Zangozako eta Agoizko suhiltzaileek gau guztia eman dute bertan garrak amatatzen. Ezin izan dira barrura sartu, argi falta delako eta hondoratzeko arriskua dagoelako. Goizean hasi dira etxebizitzaren hondakinak kentzen, eta barruan norbait ote dagoen egiaztatu ahalko dute.

Argitzeke dago etxearen maizterra barruan ote zegoen, baina hala ematen du; izan ere, autoa garajean zegoen eta senitartekoek ezin izan dute berarekin harremanetan jarri. Gizonaren logela galdara eta erregai-tangaren gainean dago.

Foruzaingoak ikerketa zabaldu du sutearen nondik norakoak argitzeko.