Garmendia: "Talentuaren Etxea oso aktibo garrantzitsua da"

Cristina Garmendia Zientzia eta Berrikuntza ministroak eguerdian, ikertzaileentzako egoitzaren aurkezpenean, esan duenez, Talentuaren Etxeari esker Donostia "talentua erakarri eta gordetzeko apustua egiten duten hirien abangoardian dago".

Odon Elorza Donostiako alkatea, Markel Olano Gipuzkoako diputatu nagusia, Rafaela Romero Batzar Nagusietako presidentea, Maria Soledad Esteban Administrazio eta Zerbitzuetako sailburuordea, Mikel Cabieces Espainiako Gobernuak EAEn duen ordezkaria eta Juan Junquera Industria Ministerioaren ordezkaria ere egon dira 9,5 milioi euro balio duen ekipamendu honen inaugurazio ofizialean.

Eraikina Mirakontxa pasealekuan dago, zehazki, Baenako dukearen pasealekuan. Ezaugarri ezberdinetako 80 apartamentu dira, familiarrak, bikoitzak edo indibidualak, 26 eta 62 metro karratu artekoak. Prezioa 480 eta 800 euro artekoa da, hileko.

Hirian I+G+B-ren eremuan lanean ari diren hogeita hamar eragileekin lotutako pertsonei eta hauen familiei aldi baterako ostatua eskaintzea da helburua. Hirira hobeto egokitzeko aukerak eta erraztasunak ere emango dizkiete, hala nola ikastetxeei buruzko aholkularitza zerbitzua.

Etxeak 6.500 metro karratu ditu, beheko solairuan, hiru solairu gehiagotan eta atikoan banatuta. Toki komunen artean entzunareto bat, bilera-gelak, erabilera askotarako beste esparru batzuk eta 60 tokiko aparkaleku pribatua daude, besteak beste.

Talentuaren Etxea Donostiako Sustapena elkarteari esker jarri du martxan Donostiako Udalak. Apirilean irekiko dute eta talentua erakarri eta hirian gordetzea izango du helburu; azken hamarkadan biderkatu egin dira berrikuntza eta ikerketari lotutako jarduerak.

Horrela, Fatronik, Donostia International Physics Center eta Inasmet izenei Nanogune, Tourgune eta ikerketa kooperatiboko beste zentro batzuk gehitu zaizkie, baita Basque Center on Cognition Brain an Language ere. I+G+B-ari lotutako zentroen bilgune garrantzitsua sortu du horrek 180.000 biztanle dituen hiri batean.

Cristina Garmendia Zientzia eta Berrikuntza ministroak kazetariei egindako adierazpenetan baieztatu duenez, Talentuaren Etxea "aktibo garrantzitsua da hiriarentzat, eta herritarrek ezagutzaren kultura eta ekonomia sortzeko egin duten apustuaren eredua da".

Garmendiak zuzentzen duen ministerioak 1,5 milioi euro zuzendu ditu proiektu honetarako, eta, azaldu duenez, eraikina "energia berriztagarriaren eta eraginkortasun energetikoaren ikur ere bada". "Orainaldi oso ona eta etorkizun bikaina" iragarri dizkio eraikinari Garmendiak.

Bestalde, Odon Elorza alkateak azpimarratu duenez, egoitza “apustu erabakigarria” da, "hiri berritzaile baten izaerak lurralde berriztatzaile batean" aurrera egiteko.