Gizartea -
Indarkeria matxista
Gizon bat atxilotu dute, emaztea eta alaba mehatxatu dituelakoan
Ustez, gizonak labana batez mehatxatu ditu, eta emakumeak eta alabak Barakaldoko etxebizitza batetik ihes egin dute.
Erredakzioa
Gizon bat atxilotu dute gaur gauean Barakaldo Bizkaiko herrian, emazteari eta alabari labana batez mehatxu egin dielakoan. Honez gainera, Herrizaingo Sailak adierazi duenez, ustezko tratu txar emaileak emaztea jo egin zuen.
Gaueko hamabiak jota egin zuten atxiloketa, Barakaldoko bizilagun batek garrasiak entzun eta Poliziari deitu ostean. Patruila etxera iritsi zenerako, gizonezkoa bakarrik zegoen bertan. Etxea oso nahasita zegoen eta gauza asko lurretik botata zeuden. Antza denez, emazteak eta alabak etxetik alde egin zuten eta senitarteko baten etxean babestu zuten euren burua.
Emakumeak adierazi zuenez, gizonak jo egin zuen liskarrean ari ziren bitartean. Sesioan ari zirela, gizonak sukaldetik labana bat hartu, eta emaztea eta alaba mehatxatu zituen. Azkenik, 43 urteko gizonezkoa, atxilotu eta aginte judizialaren esku utzi zuten.
