Gizartea -
Indarkeria matxista
Mutil gazte batek 17 urteko neska bat hil du Reusen
Hilketa matxista atzo arratsaldean jazo zen Tarragonako hiri horretako etxebizitza batean.
Agentziak | erredakzioa
Gizonezko gazte batek bikotekidea, 17 urtekoa, hil zuen atzo Reusen (Tarragona), Esquadra Mossoek jakinarazi dutenez. Ustezko hiltzaileak bere buruaz beste egin du berehala.
Hilketa matxista asteazkeneko 14:00etan jazo zen, Argentera kaleko etxebizitza batean. Hainbat herritarrek Mossoei ohartarazi zietenez, gizonezko bat kalean zetzan, etxebizitzako leiho batetik bere burua bota eta gero. Gizonezkoa larri zaurituta eraman zuten ospitalera, eta bertan hil da bart.
Etxebizitza barruan emakumezko gaztearen gorpua topatu zuten agenteek, indarkeria zantzuekin.
Ikerketa lerro guztiak zabalik badaude ere, zantzu guztien arabera hilketa matxista bat izan zen atzokoa. Ikerketaren iturrien arabera, gazteak berebiziko indarkeriarekin hil zuen bikotekidea.
Tarragonako Ikerketa Kriminalerako Dibisioak hartu zuen ikerketaren ardura.
Dagoeneko bederatzi dira indarkeria matxistaren ondorioz gizonek hildako emakumeak.
______________________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan, baina bai telefonoan. Beraz, ez ahaztu ezabatzea.
