Gizartea -
Alerta laranja
Elurrari aurre egiteko plana aktibatu du Iruñeko Udalak
Elurra kentzeko eta gatza botatzeko ibilgailuak lanean izango dira asteburu osoan zehar.
eitb.eus
Elurrari aurre egiteko plana jarri du martxan Iruñeko Udalak ostiral arratsaldean, bigarrenez negu honetan, Herritarren Segurtasuneko eta Elkarbizitzako Alorrak esan duenez.
Izan ere, Aemetek elurra iragarri du, batez ere larunbat arratsaldean eta igande goizaldean, 200-400 metroko elur-kotan. Elurraren lodiera 5 zentimetrokoa izan daiteke.
Gainera, Nafarroa erdialdean alerta dago aktibatuta haizeagatik. Larunbat goizean, eta arratsaldera arte, 75 kilometro orduko haize boladak egon litezke.
Horregatik, martxan jarri dituzte elurrari aurre egiteko Udalaren baliabideak, hau da, elurra kentzeko eta gatza botatzeko ibilgailuak eta ekortzaileak zein obren, garbiketaren eta lorategien ardura duten enpresen ibilgailuak, elurrerako, izotzerako eta gatza botatzeko moldatuak.
Negu honetan, gatza banatzeko beste puntu bat izango da Sadar kalean. Horrek, lana erraztuko du Nafarroako hiriburuaren hegoaldean. Hori da aurtengo berritasun nagusia. 600 tona gatz dituen Trinitarios kalean dagoenari gehituko zaio.
Azkenik, garraio publikoa erabiltzea gomendatu du Udaltzaingoak. Autoa erabiltzen bada, oso motel ibiltzea eta balazten erabilera saihestea ere gomendatu du. Oinezkoei kontuz ibiltzeko eskatu die.
