Gizartea -
TripAdvisor
Kontxa hondartza Europako onena eta munduko laugarrena izendatu dute
Donostiako hondartzak bi postu egin du gora TripAdvisor atariak banatzen dituen Travellers' Choice Beaches sarien munduko zerrendan. Hirugarren urtez jarraian, Europako onena da.
EITB.EUS
Donostiako Kontxako hondartza Europako hondartzarik onena hautatu du, hirugarren urtez jarraian, TripAdvisor bidaien inguruko atariak. Halaber, munduko hondartzen artean laugarrena da, eta estatu espainiarreko lehena.
TripAdvisor atariak astearte honetan hedabideei igorritako ohar baten bidez jakinarazi ditu Travellers' Choice Beaches sarien 2019ko irabazleak.
Irabazleak aukeratzeko, bidaiariek azken 12 hilabeteotan egindako iruzkin kopurua eta horien kalitatea izan ditu kontuan TripAdvisorrek.
2017an eta 2018an gertatu bezala, Kontxako hondartza Europako lehen postuan dago, Spiaggia dei Conigli (Italia), Falesia (Portugal), eta Ses Illetes (Formentera) hondartzen aurretik.
Aipaturiko webguneko erabiltzaileen iritziz, Baia do Sancho (Brasil) da munduko hondartzarik onena, Varadero (Kuba) eta Eagle Beach (Aruba) daude Kontxa hondartzaren aurretik.
Kontxaz gain, Ses Illetes (Formentera) eta Muro (Mallorca) nabarmendu ditu TripAdvisorrek estatu espainiarrean.
