Gipuzkoako autobideetan kamioien bidesaria arautzeko legea onartu dute

Gipuzkoako Batzar Nagusiek Europa Barneko Errepideen Sarea erabiltzen dituzten kamioiei ordainsariak ezartzeko legea onartu dute gaur Foru Gobernuko alderdien (EAJ eta H1) eta oposizioko talde nagusiaren (PSE-EE) aldeko botoekin.

Legegintzaldiko azken osoko bilkuran onartu dute, Gipuzkoako parlamentuan, kanon hori ezartzeko irizpideak finkatzen dituen arau forala.

Merkantzien garraiorako ibilgailu astunei, 3,5 tonakoei baino gehiagokoei, Europa Barneko Errepide Sarean ordainsaria ezartzeko oinarri eta irizpideak biltzen ditu idatziak.

Foru erakundeak Etxegarateko tarteari eman nahi dio lehentasuna, datorren urtean, ordainsaria ezartzeko orduan, pilaketa asko izaten diren toki horretan ibilgailuen joan-etorria bideratzen lagunduko duelakoan. Eneko Goia Bide Azpiegituretako diputatuak kazetariei azaldu dienez, ez dute baztertu erabakia A-15 eta N-121-A autobideetara zabaltzea.