Etorkinei doako laguntza emango diete EAEko abokatuek

Irregulartasun egoeran egoteko arriskua duten etorkinei doako zerbitzua eskainiko die Eusko Jaurlaritzak aurrerantzean. Abokatuen aholkuei eta laguntzari esker, pertsona horiek paperak ez galtzea da Justizia eta Lan Sailetako helburu nagusia.

Lan eta Gizarte Gaietako eta Justizia Sailek hitzarmena adostu dute gaur goizean Euskal Autonomia Erkidegoko Abokatu Elkargoekin, etorkinei doako zerbitzu hau eskaini ahal izateko.

Orain bi hilabete martxan jarri zuten: 900 840 126 telefono zenbakian, etorkinek haien arazoak azaltzeko aukera izango dute. Adituek behar duten informazioa igorriko diete, arazo horiek konpondu ahal izateko.

Juridikoki arazo handia denean, abokatu batek hartuko ditu etorkinak.

Krisiak eraginda, modu erregularrean dauden etorkin asko bazterketa sozialean egoteko arriskuan daudela gogoratu du gaur Miguel Gonzalez Inmigrazio zuzendariak. Azken bi hilabeteetan 100 bat pertsonek jo dute zerbitzu berrira. Zenbait egoera "konplexuak" zirelako, abokatuengana bideratu dituzte.

Inmigrazio Legearen aurrean aholku juridikoak ematea da xede nagusia, Gonzalezen hitzetan.

Araba, Bizkaia eta Gipuzkoako Abokatu Elkargoekin sinatutako akordioari esker, etorkinei arreta profesionala eta kalitatezkoa emango zaiela esan du Inmigrazio zuzendariak.