Gizartea -
Indarkeria matxista
Gizon batek mehatxu, irain eta eraso egin dio bikotekide ohiari Gasteizen
Eztabaida izan zuela onartu, baina emakumeari eraso egin izana ukatu zuen gazteak. Nolanahi dela, biktimaren adierazpenetan eta lekukoen testigantzetan oinarrituta, gaztea atxilotzea erabaki zuten.
AGENTZIAK | ERREDAKZIOA
22 urteko gazte bat atxilotu du Udaltzaingoak Gasteizen, bikotekide ohia mehatxatu eta iraintzeagatik. Gainera, dirudienez, ileetatik tira egin dio, dantzaleku batetik irtetean.
Udaltzaingoak jakitera eman duenez, igandean gertatu zen erasoa, 07:00ak aldera, Florida kaleko dantzaleku baten kanpoaldean. Gazte talde baten abisua jaso zuten, orduan, udaltzainek. Ustezko erasotzailea bikotekide ohiari eraso egiten ari zela jakinarazi zioten agenteei han bildutako lagunek.
Handik gutxira, Amarika plazan atxilotu zuten gaztea. Azken honek eztabaida izan zuela onartu, baina emakumeari eraso egin izana ukatu zuen. Nolanahi dela, biktimaren adierazpenetan eta lekukoen testigantzetan oinarrituta, gaztea atxilotzea erabaki zuten.
________________________________________
Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak edota deitu telefono hauetako batera: 900 840 111 (Euskadin) edo 016 (Estatu osoan); doakoak dira eta ez dute arrastorik uzten fakturan.
