Urtebeteko kartzela-zigorra iruindar bati, haur pornografia partekatzeagatik

Urtebeteko kartzela-zigorra ezarri diote Iruñeko bizilagun bati, haur pornografia (biktimak 16 urtetik beherakoak dira) berehalako mezularitza aplikazio baten bitartez partekatzeagatik, Nafarroako Justizia Auzitegi Nagusiak ohar bidez jakinarazi duenez.

Epaian irakur daitekeenez, Iruñeko Zigor Arloko Lehen Epaitegiak kondena eten dio 34 urteko gizonari, baldin eta bi urtean haur pornografiarekin lotutako deliturik (edukitzea eta zabalkundea) egiten ez badu. Fiskalak akordioa lortu du defentsaren abokatuarekin.

2017ko otsaila eta uztaila bitartean, erruztatuak KIK Messenger aplikazioa erabili zuen materiala partekatzeko. 2018ko maiatzaren 21ko ebazpen judizialaren baitan, iruindarraren etxebizitza miatu zuten eta USB memoria batean haur pornografiako milaka artxibo multimedia aurkitu zituzten. Epaiaren arabera, horietako asko "bereziki gogorrak" omen ziren adingabeen adina aintzat hartuta.

Sententziak jasotzen duenez, disko gogor batean eta bere eskuko telefonoan ere materiala gordetzen zuen.

Ebazpen judizialaren arabera, akusatuak nortasun nahasmendua eta sexu bulkada gehiegizkoa ez ezik, hainbat droga kontsumitzen ditu. Gaineratu duenez, bere gaitasun intelektuala bere horretan mantentzen badu ere, bere jokabide sexuala kontrolatzeko zailtasun handiak ditu.

Espetxe-zigorraz gain, bi urteko zaintzapeko askatasuna ezarri diote eta tratamendu psikiatriko bat jarraitu beharko du.