Gorbeiako Parke Naturalaren 25. urteurreneko jarduerak igandean hasiko dira

Gorbeiako Parke Naturalak 25 urte betetzen ditu eta Arabako Foru Aldundiak jardueraz betetako egitaraua antolatu du parkearen balio naturalak eta honen bioaniztasunaren ekarpenak ezagutarazteko. Jarduerak igande honetan hasiko dira, ekainaren 9an, gailurrera igoz Bizkaiko eta Arabako isurialdeetatik.

Aldundiko Ingurumen Sailak komunikatu baten bidez jakinarazi duenez, goizeko bederatziak eta laurdenetan hasiko dira bi aldeetatik aldi berean igotzen, Zaratetik eta Saldropotik.

Gurutzera 12:30ean iristea dago aurreikusita eta bertan foru arduradunek hamaiketakoa emango diete mendizaleei. Arabatik abiatzen direnak Bizkaitik jaistea proposatu dute, eta Bizkaitik abiatzen direnak Arabatik itzultzea.

Ospakizunak ekainaren 21ean jarraituko du, orain dela 25 urte Gorbeia parke natural izendatu zuten egunean. Egun horretan, mota guztietako jarduerak izango dira: umeentzako antzerkia, hitzaldi etnografikoa, animaziozko film dokumental bat eta “ezusteko ekintzak”. Horrez gain, Gorbeiako elementu batzuekin betetako kapsula bat lurperatuko dute, eta 2044. urtera arte ez dute irekiko.

Omenaldia lehen sektoreari

Foru erakundeak ekimen hauekin esparru naturalarekin bizikidetzan dagoen lehen sektorea ere omendu nahi duela nabarmendu du, “landa-eremuko bizitzaren eta ingurumen iraunkortasunaren arteko oreka ahalbidetuz”.

Urteurrenaren testuinguruan, ‘Loredun belardien lehiaketa’ ospatuko da, natura errespetatzen duen abeltzaintzaren eta horren kudeaketaren garrantzia ezagutarazteko. 20.226 hektarearekin, Gorbeiak Euskadi osoan egokien zaindutako mendiko fauna dauka, baita ongi egituratutako espezieen komunitatea ere.