Gizartea -
Emakumeen kontrako indarkeria
Alabaren erreguek emazteari eraso egiteari uztea lortu dute, Bilbon
Ustezko erasotzailea epailearen esku dago. Biktimaren arabera, urte asko daramatza erasoak eta irainak jasaten, batzuetan seme-alaben aurrean.
Erredakzioa
Ostiralean 45 urteko gizonezkoa atxilotu zuten Bilbon emazteari tratu txar fisikoak eta psikologikoak emateagatik. Erasotzailea emaztea jotzen hasi zen adingabeko alaba aurrean zela, eta neskatoa erreguka hasi zen jarrera aldatzeko eskatuz. Biktima ospitalera eraman zuten.
Herrizaingo Sailak jakitera eman duenez, gertaera ostiralean izan zen, 20:45ak aldera, bikoteak Bilbon duen etxebizitzan.
Eztabaidan aritu ondoren, senarrak hainbat kolpe eman zizkion emakumeari gorputzeko leku ezberdinetan. Alaba txikia bertan egotea eta egindako erreguek erasoari amaiera ematea lortu zuten.
Ondoren, biktimak abisua eman zion Ertzaintzari eta agenteek senarra atxilotu zuten genero indarkeria delitua egotzita. Biktimaren arabera, urte asko daramatza erasoak eta irainak jasaten, batzuetan seme-alaben aurrean.
Emakumeak zituen kolpeak ikusita, ospitalera eraman zuten. Erasotzailea epailearen esku utzi dute.
