Gizon bat jipoitu dute Plentzian, jazarriak izaten ari ziren bi emakume babesteagatik

Asteburuan sei gizonek jipoitu egin dutela salatu du beste gizon batek Plentzian, Eusko Jaurlaritzako Segurtasun Sailak eitb.eus-i baieztatu dionez.

Biktimak atzo (astelehena) azken orduan aurkeztu zuen salaketa ertzain-etxean. Biktimaren lekukotzaren arabera, hasiera bi lagun ziren baina, gerora, beste lau batu zitzaizkien.

Hainbat hedabidek zabaldutako informazioaren arabera, erasoa igande goizaldean (07:00) gertatu zen Plentziako jaietan. Bi emakumek laguntza eskatu zioten biktimari, hainbat gizon segika zituztela eta jazartzen ari zitzaizkiela argudiatuta. Segurtasun Sailak ez du informazio hori baieztatu nahi izan.

Antza denez, biktimak jazarleei aurre egin zien eta emakumeak bakean uzteko eskatu zien. Biktimaren esanetan, hasierako bi gizonei beste lau batu zitzaizkien eta guztien artean eraso egin zioten.

Zauritua Urdulizko Ospitalera eraman zuten. Bi saihets hautsita ditu eta zauria, ostera, masailean. Erietxetik irten ostean, atzo iluntzean aurkeztu zuen salaketa ertzain-etxean.

Ertzaintzak ikerketa abiatu du gertaturikoa argitzeko.

Dena den, oraingoz ez dute inor atxilotu.