Gizartea -
Bizkaia
Izaro uhartean aurkituriko hiru lehergailu zartarazi ditu Ertzaintzak
Obusetako bat osorik zegoen, eta beste biak hondarrak baino ez ziren, baina hirurek zuten karga leherkorra, eta arriskutsua zen horiek manipulatzea oso hondatuta zeudelako.
AGENTZIAK | ERREDAKZIOA
Lehergailuak Desaktibatzeko Unitateko agenteek hiru lehergailu leherrarazi zituzten asteartean Izaro uhartean, Bermeo eta Mundaka aurrean, Eusko Jaurlaritzako Segurtasun Saileko iturriek jakinarazi dutenez.
10:20 aldera, Izaron ikerketa ornitologiko bat egiten ari ziren pertsona batzuek SOS Deiak 112 zerbitzura deitu zuten, lehergailuak aurkitu zituztela esateko. Ertzaintzaren agenteak bertaratuta, Gerra Zibilekoak izan zitezkeen 75 milimetroko hiru lehergailu zirela egiaztatu zuten.
Obusetako bat osorik zegoen, eta beste biak hondarrak baino ez ziren, baina hirurek zuten karga leherkorra, eta arriskutsua zen horiek manipulatzea, oso hondatuta baitzeuden. Hori dela eta, agenteek toki seguru batean zartarazi zituzten, uharteko faunak kalterik jasan ez zezan.