Gizartea -
Indarkeria matxista
Gizon batek bikote bat mehatxatu du eta neskari ukituak egin dizkio Donostian
Ertzaintzak erasotzailea atxilotu du. Gertakariak 06:50 aldera jazo dira Kontxako hondartzan. Atxilotua bikote nerabearengana joan da, eta guraize batzuekin mehatxatu ditu.
eitb.eus
Ertzaintzak 25 urteko gizon bat atxilotu du goizean, Donostian, mehatxu delitu bat eta sexu askatasunaren aurkako beste bat egotzita. Atxilotua bikote nerabe batengana joan da Kontxako hondartzan, eta guraize batzuekin mehatxatu ditu, eta baita neskari ukituak egin ere.
Eusko Jaurlaritzako Segurtasun Sailak jakitera eman duenez, gertakariak 06:50 aldera jazo dira ostiral honetan, Kontxako hondartzan.
Dirudienez, gaztea bikotearengana joan da, eta zigarro bat eskatu die. Ezetz esan diotenean, gizonak ez du etsi, oldartu egin zaie, eta guraize batzuekin mehatxatu ditu nerabeak. Gainera, erasotzaileak neskarengana jo du eta ipurmasailak ukitu dizkio.
Bikoteak alde egitea erabaki du, baina erasotzaileak jarraitu egin die Easo kaletik. Hori ikusita, Ertzaintzari abisua ematea erabakita, 112 telefonora deitu dute.
Agenteek Easo kalean aurkitu dute susmagarria, eta, miaketa eginda, guraizeak atzeman dizkiote.
Ondorioz, biktimek salatutakoa entzundakoan, gizona atxilotu dute, mehatxuak eta sexu askatasunaren aurkako delitua leporatuta.
Atxilotua epailearen esku jarriko dute ertzain-etxean eginbideak bukatu ondoren.