Gizartea -
2020-2021 ikasturtetik aurrera
Medikuntza gradua eskaintzeko baimena jaso du Deustuko Unibertsitateak
Unibertsitate pribatuak Bilbon duen campusean emango dira eskolak. Guztira, 80 plaza eskainiko ditu.
Agentziak | Erredakzioa
Deustuko Unibertsitateak Medikuntza gradua eskainiko du datorren ikasturtetik aurrera, erakunde akademikoak gaur jakinarazi duenez. Denera 80 ikasleentzako lekua eskainiko du, eta Bizkaiko campusean eskainiko dituzte eskolak
Eskolak eman ahal izateko azken baimen ofizialaren faltan zegoen unibertsitatea, eta ostegun honetan lortu du azkenean Unibasq Euskal Unibertsitate Sistemaren Kalitate Agentziak eman beharreko oniritzia.
Izan ere, gradua ikasturte honetan hasteko asmoa zuen Deustuko Unibertsitateak, baina Unibasqek egindako eskaera batzuk tarteko, atzeratu egin behar izan zuen.
Unibertsitateak ohar batean azaldu duenez, iaz 700 bat eskaera jaso zituen. Erakunde akademikoaren esanetan, aukeratuta ditu 29 irakasle eta izenpetuta praktikaldia egiteko hitzarmenak 11 ospitale pribaturekin.
Bilboko campuseko eraikin berri batean (900 metro koadro) emango dituzte eskolak.
