Gizartea -
Abisu horia
Oiz mendian 122 km/h-ko haize-bolada bat izan da
Euskalmetek Garbean duen estazioan, 118,5 km/h-ko bat jaso dute. Urduñan eta Matxitxakon ere (116,4 eta 110,4, hurrenez hurren), haizea oso bizi ibili da.
EiTB.EUS
Euskalmet Euskal Meteorologia Agentziak Oiz mendian duen estazioak 122,1 km/h-ko haize-bolada bat jaso du ostiral goizean, Euskalmetek berak bere web orrian ematen dituen datuen arabera. EAEn azken orduotan izandako haize-ufadarik handiena da; Bizkaia eta Gipuzkoa abisu horian daude ostiral honetan, arriskua baitago haizeak 100 km/h-tik gorako abiadura hartzeko mendiguneetan eta itsasaldean, eta 80 km/h-tik gora kokatzeko gainerako lekuetan.
Ostiraleko lehen orduetan, Bizkaian ibili da haizea bizien. Oizeko datuaz gain (10:00etan neurtu dute aipatutako ufada), Garbean (Balmaseda) jasotako datua da nabarmentzekoa; izan ere, 09:50ean, 118,5 km/h-ko bolada bat izan da bertan. Matxitxakon, 110,4 km/h-ko bat jaso dute, eta Untzuetan, aldiz, 93,5 km/h-ko bat.Bilbon, daturik esanguratsuena Deustun jaso dute; 92,4 km/h-ko haize-ufada bat jaso dute bertan.
Gipuzkoan ere izan dute 100 km/h-tik gorako Haizea; hain zuzen ere, Bidanian, 09:10ean, 104,1 km/h-ko ufada bat jaso dute. Ordizian (93,1) eta Pasaiako portuan (91,1) ere bizi ibili da haizea.
Araban, aldiz, goizaldea eta goiza lasaiagoa izan da. Ilarduian 88,6 km/h-ko haizea ibili da, eta horixe da jasotako boladarik handiena.
Eusko Jaurlaritzaren Segurtasun Sailak jakinarazi duenez, haizeak eragindako abisu horia larunbatean ere izango da indarrean (hilaren 23an), ostiral honetaz gain.
