'Suminduek' Kongresuaren aurrean kanpatuko dute astearte gauean

''Suminduek'' Madrilgo Kongresuaren aurrean kanpatuko dute astearte gauean, hurrengo egunean "diputatuei ongietorria emateko helburuarekin". Izan ere, asteazkenean Lan-hitzarmenari buruz arituko dira Kongresuan. Maiatzak 15 Mugimenduak deialdia zabaldu du gaur sare sozialen bidez.

Azaldu dutenez, Prado Pasealeku ondoan egingo dute kanpaldia, Parlamentutik oso gertu.

Ekimenak arratsaldeko 19:00etan hasiko dira. "Lozakua ekarri eta pijama jantzita etorri", dio Accion de Madrid taldeak sare sozialetan iragarritako deialdian.

Ordu bat beranduago, 20etan, asanblada informatiboa egingo dute, Lan-hitzarmenaz hitz egiteko. "Egunotan landutako informazioa emango dugu", esan dute deitzaileek. 0:00etan "gaueko" ekimenak burutuko dituzte, goizaldeko 1:00ak arte.

Goizeko 8:00etan "diputatu eta auzipetuei" harrera egingo diete. "Ordezkatzen ez gaituztela gogoratuko diegu, eta lan eskubideen aurkako neurriak adostea ez zaiela erraza izango esango diegu".

Ondoren, 12:00etan, eztabaida taldeak antolatuko dituzte. 19:00etan asanblada berria egingo dute.

Madrilgo Kongresuak lan-hitzarmenari buruzko eztabaida egingo du asteazkenean.