Bilbok bidegorriko beste zati bat ireki du, Casilda Iturrizar parketik Basurtura

Bilboko Udalak 762 metroko bidegorri-zati bat sortu du, Casilda Iturrizar parkea Basurturekin eta Ametzolarekin lotzeko. Iraganean, zati hori egitea baztertu zuten, eskaria txikia baitzen, baina oraingo egoera "oso bestelakoa" da.

Alfonso Gil Bilboko Udalaren alkateorde eta Mugikortasun eta Jasangarritasun Saileko zinegotziak inauguratu du bide hori, ostegun honetan. Gilek berretsi du zati berri hau ez dela "ideala", baina dagoenarekin "egin ahal izan dena" dela adierazi du.

Gilek zehaztu duenez, Sabino Arana kalean dagoen zati berri hau noranzko bakarrekoa da gorako norabidean; izan ere, bizikletek gainerako ibilgailuekin partekatzen dute okertutako bide hori, eta, azken batean, zirkulazioa eragozten dute, autoek abiadura murriztu behar dutelako. Horregatik, errepidetik doan bidea jaistekoa baino ez da.

Hala, bidegorri berri hau beste bidegorri-zati batzuei lotzen zatzaie. Casilda Iturrizar parkearen eta Anselmo Clave kalearen arteko elkargunea eta Bihotz Sakratuko biribilgunean amaitzen zen bidegorri-zatia lotzen ditu; beste norabidean, aldiz, Sabino Arana kalean, Trenbide etorbideko eta Sabino Aranako bidegorriak lotzen ditu.

Partekatutako zirkulazio-guneak margotuko dituzte, txirrindularien segurtasunerako

Gainera, Udalak autoek eta bizikletek partekatzen dituzten zirkulazio-guneak margotzea erabaki du, txirrindulariek segurtasun handiagoa izan dezaten eta auto-gidariekin gaizkiulerturik egon ez dadin.

Bizkaiko hiriburuko bidegorri-sarea 57,3 kilometro luze da, errei esklusiboak eta partekatutako erreiak kontuan izanik, eta azken sei hilabeteotan ia miloi bat bizikleta ibili dira bertatik. Urtea amaitu aurretik, Udalak beste 2,3 kilometro gehitzea espero du. Tartean, zati berri hau San Mameseko geltokiarekin lotuko duen bide bat irekiko dute.