37 urteko gizon bat intoxikatu da Ilurdotzen, kea arnastuta

Sute batek kalte handiak eragin ditu Ilurdotzeko etxebizitza batean, eta 37 urteko jabea Nafarroako Ospitale Gunera eraman behar izan dute, kea arnastu baitu, Foru Gobernuak jakitera eman duenez.

Sua 21:10 aldera piztu zen, ostegunean. Antza denez, tximinian hasi eta teilatuaren egurrezko egituratik zabaldu zen. Gutxi gorabehera, teilatuaren erdia kiskali du, eta lehen solairuari ere eragin dio.

Cordovillako suhiltzaileak bertaratu dira sua itzaltzera, eta 02:30ean itzuli dira parkera, hondakinak kendu eta garbiketa lanak amaitu ondoren.

Foruzaingoak ikerketa abiatu du gertatutakoa argitzeko.

Suhiltzaileak Ilurdotzen. Argazkia: Nafarroako suhiltzaileak