Gizartea -
Anisakis
Anisakisa atzeman dute Balmasedako ikastola bateko bazkarian, intoxikaturik gabe
Zubi Zaharra ikastolako haur batek ziurtatu zuen bakailaoan zizare bat ikusi zuela. Dena den, anisakisa zuen arraina kendu egin zuten, osasunerako ondoriorik gabe.
Agentziak | Erredakzioa
Anisakis izeneko parasito bat atzeman dute Balmasedako (Bizkaia) ikastola bateko bazkarian. Hala ere, bakailaoa ultraizozteko prozesuaren ondorioz parasitoa hilda zegoen. Ikastetxeko iturrien arabera, ez da ikasle intoxikaturik egon.
Joan den asteko ostiralean, Zubi Zaharra ikastolako zenbait gurasok alarma-ahotsa piztu zuten, haur bati jangelan zerbitzatu zioten bakailaoan zizare bat ikusi zuela entzun ziotelako. Anisakisa zuen arraina kendu egin zuten, ikastetxeko ikasleen osasunerako ondoriorik pairatu gabe.
Ikastolak parasitoa zeukan arraina lagin gisa erabili zuen, eta janaria hornitzen zuen catering enpresari abisua eman zion, baita herriko anbulatorioari eta osasun ikuskariari ere, arriskurik ez hartzeko.
Beharrezko egiaztapenen ostean, otorduetako janarian anisakis gehiagorik ez zegoela ondorioztatu zuten. Ikastetxeak bilera bat egin zuen gurasoekin, lasaitasuna helarazteko, antzemandako parasitoa ultraizozteko prozesuari esker hilda zegoela adierazteko, eta jakinarazi zitzaien ikasleek ez zutela inolako arriskurik izan.