Bizkaiko eta Arabako etxebizitzetan lapurtzen zuen gaizkile talde bat desegin dute

Bizkaiko eta Arabako etxebizitzetan lapurretak egiten espezializatuta zegoen gaizkile talde bat desegin du Ertzaintzak. Zehazki, Bilboko eta Laudioko etxebizitzetan lapurtu zuten, eta taldea osatzen zuten hiru kideak espetxean sartu dituzte jada.

Eusko Jaurlaritzako Segurtasun Sailak jakitera eman duenez, Laudioko (Araba) etxebizitza batean indarra erabiliz egindako lapurreta baten ostean hasi ziren talde horren inguruko ikerketak.

Susmagarriei egindako jarraipenen ondorioz, bizileku finkorik ez zuten bi kidek eta Ezkerraldean bizi zen beste batek osatutako talde antolatu eta hierarkizatu bat zela frogatu zen.

Segurtasun Sailak azaldu duenez, ikerketa ez zen erraza izan, taldekideen joan-etorriengatik eta lapurretak egin aurretik ertzainen presentzia atzemateko ezartzen zuten segurtasun-protokoloagatik. Alabaina, lapurrek hartutako zaintza-neurriak ez ziren eraginkorrak izan eta ertzainek ikerketa amaitu eta susmagarriak atxilotzea lortu zuten.

Bilboko Euskalduna kaleko etxebizitza batean lapurtzen saiatzen ari zirela harrapatu dituzte.

Oraingoz, Bilboko bi etxebizitzatan eta Laudion (Araba) indarra erabiliz egindako hiru lapurreta egotzi dizkiote talde kriminalari.

Barakaldoko hainbat pisutan egindako miaketen ondorioz, ertzainek lapurretetan lapurtutako bitxiak, 4.000 euro baino gehiago eta dokumentazio faltsua berreskuratu dituzte. Horrez gain, mota guztietako sarrailak irekitzeko gaizkileek erabiltzen zituzten tresnak pilatzeko erabiltzen zuten lantegi bat atzeman dute.