Euriarekin eta tenperatura baxuekin jarraituko dugu

Euskalmet agentzia meteorologikoaren arabera, gaur, asteazkena, giro goibel eta hezearekin jarraituko dugu. Ipar-mendebaldeko haizea harro samar ibiliko da eta termometroek ez dituzte 20 ºC gaindituko leku askotan. Zerua hodeiz estalita egongo da, bereziki goizean eta kantauriar isurialdean, euri-jasak nabarmenduko dira. Arratsaldeak aurrera egin ahala, aterruneak luzatuz joango dira eta zenbait puntutan urdinguneren bat zabalduko da.

Ostegunean eguraldiak hobera egingo du, gehienbat arratsaldean. Egunaren lehen zatian kantauriar isurialdeko zenbait puntutan zirimiri apur bat egin lezake. Egunak aurrera egin ahala, atertu egingo du eta ostarteak zabalduko dira. Haizeak iparraldetik jotzen jarraituko du eta giro freskoa izango da nagusi. Tenperaturek gorantz egin arren, 20-22 ºC inguruan kokatuko dira.

Ostiralean tenperaturek gora egingo dute eta eguzki giroa nagusituko da. Goizak aurrera egin ahala zerua urdinduz joango da. Gainera, tenperaturek uda sasoiko balioak harrapatuko dituzte, maximoak 24-28 ºC artekoak izango baitira.