Ehiztari bat salatu dute drogen kontsumopean 23 txakur garraiatzeagatik

Tafallako Foruzaingoak Errioxako bizilagun bat salatu du substantzia estupefazienteen eraginpean gidatzeagatik eta atoian 23 txakur garraiatzeagatik, erdiak baino gehiago mikrotxipik gabe eta txertoak jarri gabe.

Foruzaingoak Erriberritik gertu atoi bat zeraman noranahiko ibilgailu bat ezohikoa zen maniobra bat egiten ari zela ikusi zuen. Geldiarazi ostean, agenteek marihuana usain handia atzeman zuten ibilgailuan.

Gidariak (ehizarako arropa zeraman) cannabisean positibo eman zuen, eta salaketa egin zuten horren kontra, substantzia estupefazienteen eraginpean gidatzeagatik (1.000 euro eta 6 puntuko isuna). Era berean, aihotz bat eta labana bat antzeman zizkioten (ehiza larrian erabiltzen dira horrelakoak), eta Ibilgailuen Azterketa Teknikoa gainditu gabe zuen ibilgailu bat gidatzeagatik ere salatu zuten.

Atoiaren barruan, 23 txakur aurkitu zituzten, pilatuta. Horien egoera egiaztatzeko, Foruzaingoak Udaltzaingoen laguntza eskatu zuen. Animaliak segurtasun zein lasaitasun handiagoarekin aztertzeko, Tafallako zezen-plaza egokitu zuten.

Behin zezen-plaza barruan, foruzainek animalien dokumentazioa aztertu zuten, eta, bertan egiaztatu zutenez, hamar txakurrek bakarrik zuten mikrotxipa jarrita eta txertoen kartilla osatuta.

Beraz, Foruzaingoaren Ingurumena Babesteko Brigada jakinaren gainean jarri zuten, espedientea izapidetzeko.