Gazte bat atxilotu dute Donostian, beste bati laban batekin erasotzeagatik

Ertzaintzak 26 urteko gazte bat atxilotu du Donostiako aterpetxe batean, beste gizon bati sukaldeko aizto batekin aurpegian eraso egiteagatik. Erasotzaileak jostura-puntuak behar izan zituen zauriak eragin zizkion.

Eusko Jaurlaritzako Segurtasun Sailaren arabera, gertakariak joan den ostegunean izan ziren, 08:00ak aldera, Donostiako aterpetxe batean. Ordu horretan, Ertzaintzaren  patruila bati dei egin zioten, eztabaida batean murgilduta zeuden bi lagunen arteko eraso bat izan zelako.

Berehala bertaratu ziren agenteak, eta lokaleko arduradun batekin hitz egin ostean, gizon batek beste bati sukaldeko aizto batekin aurpegian ebaki bat egin ziola adierazi zieten.

Jarraian, agenteek egiaztatu zuten biktimak masailean ebaki bat zuela eta jostura-puntuak behar zituela. Hortaz, erasotzailea identifikatu eta atxilotu egin zuten, lesio-delitu bat egotzita, eta ertzain-etxera eraman zuten. Atxilotua epailearen esku utzi dute Donostiako Guardiako Epaitegian.