Amak duela 10 hilabete bahitu zuen ume katalana erreskatatu dute

Dominikar Errepublikan amak bahituta hamar hilabete pasatu dituen umearen aita Karibeko herrialde horretara iritsi da gaur, adingabearen bila. Bere semea berreskuratuta, "amesgaizto bat amaitu da", adierazi du.

Polizia dominikarrak Puerto Plata hirian (herrialdearen iparraldean) erreskatatu zuen atzo haurra. Hamar bat hilabete eman ditu bahituta, higiene eta elikadura baldintza txarretan.

Espainiako kontsulatu orokorreko bozeramaile batek, haurraren aitaren abokatuek uztailaren erdialdean jarritako salaketa deitu zuenak, adierazi duenez, "haurra egoera oso txarrean zegoen, txabola batean, txerrien alboan, eskolara joan gabe, gaizki janez eta higienerik gabe".

Ama dominikarra da, eta ez dute bere izena eman nahi izan. Irailaren 15ean Dominikar Errepublikara joan zen semearekin oporrak pasatzeko, baina egonaldia luzatu egin zen, atzo Poliziak azken hori erreskatatu zuen arte.

36.600 euroko erreskatea eskatzen zuen

Emakumeak, bitartean, umearen aitari bi milioi peso (36.600 euro inguru) eskatzen zizkion, semea berreskuratu nahi izanez gero.

Espainiako enbaxadak eta kontsulatuak agintari dominikarrei eman zien aitaren salaketa, eta Karibeko herrialdeko Poliziak ikerketei ekin zien, azkenean, umea salbatzea lortuz.