458 salaketa eta 6 atxiloketa konfinamendua hausteagatik, asteazkenean, EAEn

Bizkaian jarri dira salaketa gehien, 201; Gipuzkoa dago ondoren, 184rekin, eta Araba, azkenik, 73rekin.

Ertzain bat, gidari baten paperak aztertzen. ETBko bideo batetik ateratako irudia.

Agentziak | Erredakzioa

publikatuta: 2020/03/26 14:07 (UTC+1)

azken eguneratzea: 2020/03/26 14:34 (UTC+1)

Ertzaintzak eta EAEko udaltzaingoek sei pertsona atxilotu eta 458 salaketa jarri zituzten asteazkenean, aurreko egunean baino 140 gutxiago, koronabirusaren eraginez ezarritako alarma egoeraren konfinamendu neurriak hausteagatik.

Atxiloketetako bat Ertzaintzak egin zuen Gipuzkoan, eta beste bostak udaltzaingoek egin dituzte: bat Araban, hiru Bizkaian eta beste bat Gipuzkoan.

Salaketa guztien artean, 214 Ertzaintzak egin zituen, eta udaltzaingoek, berriz, gainerako 244ak, guztiak konfinamendu neurriak ez betetzeagatik.

Bizkaian jarri zituzten salaketa gehien, 201, eta 184 jarri zituzten Gipuzkoan, eta 73, berriz, Araban.

Orotara, asteazkenean 1.858 pertsona identifikatu zituzten; 796 Ertzaintzak eta 1.062 udaltzaingoek.

Halaber, 2.491 ibilgailu geldiarazi zituzten; 770 Ertzaintzak eta 1.721 udaltzaingoek.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Zalantzarik baduzu edo gaitza hedatu den gune batera bidaian joan ostean sintomarik baduzu, Osasun Batzordearen telefonora dei dezakezu: 900 20 30 50 (EAE) eta 948 290 290 (Nafarroa). Gogoratu COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak bakarrik dira gomendagarriak sintomak badituzu edo adineko pertsonekin edo immunodeprimituekin harremanetan bazaude.

Hau zure interesekoa bada, baliteke beste gai hauek ere izatea

Gizartea Eguneko albisteak Albisteak Koronabirusa olatu berria

458 salaketa eta 6 atxiloketa konfinamendua hausteagatik, asteazkenean, EAEn

Esteka kopiatuta