Gizartea -

Laneko segurtasuna

Garbitzaileen sektoreak babesteko material gehiago eskatu dio Jaurlaritzari

Garbiketako langileei norbera babesteko ekipamenduak helarazteko zailtasunak dituztela salatu dute.

Garbitzaile bat, autobus bat barrutik garbitzen. Argazkia: Efe.
Garbitzaile bat, autobus bat barrutik garbitzen
Garbitzaile bat, autobus bat barrutik garbitzen. Argazkia: Efe.

Agentziak | Erredakzioa

Whatsapp Facebook Twitter Telegram Email

Garbiketa Enpresen Elkarte Profesionalak EAEn ari diren enpresei langileak babesteko ekipamenduak lortzeko laguntza eskatu dio Eusko Jaurlaritzari. Egunotan, garbiketako langileak ahalegin berezia egiten ari dira zentro eta eremu guztiak "araudiari jarraituta" garbitu eta desinfektatzeko, koronabirusa hedatzea galarazteko.

Ohar baten bidez adierazi dutenez, idatzi bat bidali diote Jaurlaritzari, "garbiketako langileei euren lana segurtasunez egiteko behar duten materiala eta ekipamenduak emateko zailtasunak" dituztela ohartarazteko.

Halaber, "ekipamendu horiek lortzearen garrantzia" azpimarratu dute, "ohiko hornitzaileek ezin baitiote dagoen eskaerari erantzun", eta hornitzeko laguntza ere eskatu diote.

Oinarrizko jarduera

Horrez gain, garbiketa "oinarrizko jardueratzat jotzea" eskatu dute, eta "orain inoiz baino gehiago, garbiketa lanak indartzea"; izan ere, "ezinbestekoa" da "gaitza kutsatzeko arriskua txikitzeko".

Azkenik, garbiketa sektoreko elkarteek gogora ekarri dute estatu espainolean 400.000 pertsona ari direla eta euren lana "oinarrizkoa" dela "gizarte osoaren osasun publikoa bermatzeko, egunero lanean dabiltzalako prebentzioan laguntzeko eta gaitza kutsatzeko arriskua ekiditeko".

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Zalantzarik baduzu edo gaitza hedatu den gune batera bidaian joan ostean sintomarik baduzu, Osasun Batzordearen telefonora dei dezakezu: 900 20 30 50 (EAE) eta 948 290 290 (Nafarroa). Gogoratu COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak bakarrik dira gomendagarriak sintomak badituzu edo adineko pertsonekin edo immunodeprimituekin harremanetan bazaude.

Hau zure interesekoa bada, baliteke beste gai hauek ere izatea
Gizartea Eguneko albisteak Albisteak Koronabirusa