Gizartea -
Koronabirusa
Euskadik 8.000 test baino gehiago egingo ditu egoitzetan, adinekoei eta langileei
Hala iragarri du Nekane Murga Osasun sailburuak; halaber, adierazi duenez, ikertzen ari dira Osakidetzako osasun-profesional guztiei nola egin testak.
Agentziak | Erredakzioa
Euskadiko adinekoen egoitzetan, COVID-19 gaitza atzemateko 8.000 test baino gehiago ari dira egiten, erabiltzaileei eta osasun-langileei, Nekane Murga Eusko Jaurlaritzako Osasun sailburuak adierazi duenez; test horien helburua da "aztertzea koronabirusaren aurrean nolako immunitatea duten". Horrez gain, Murgak iragarri du ikertzen ari direla Osakidetzako osasun-profesional guztiei nola egin testak.
Sailburuak prentsaurreko telematikoa eman du ostiral honetan, Iñigo Urkullu lehendakariarekin batera, Kontseilu Aholkulariaren bilera amaituta. Murgak onartu duenez, "adinekoen egoitzetako egoera lehentasuna da une honetan, eguneroko gure jarraipenean eta balorazioan"; hortaz, egunez egun ari dira lanean "ahulenak diren pertsonen artean saihesteko gaitzaren hedapena".
Testuinguru horretan, erakundeen COVID-19aren aurkako konpromisoa nabarmendu du; azpimarratu duenez, egunero ari dira proba gehiago egiten, "bereziki egoitzetako erabiltzaileen eta sektore horretako langileen artean".
"Orain arte, batez ere, sintomak zituztenei egin izan dizkiegu testak, baina, dagoeneko, immunitatea aztertzeko probak ari gara egiten, 8.000 proba baino gehiago. Ikertzen ari gara nola egin ahal dizkiegun Osakidetzako osasun-langile guztiei", esan du.
Halaber, adierazi du gerora ahulak diren beste gizatalde batzuekin jarraituko dutela; besteak beste, minbizia pairatu duten herritarrekin, edo arrisku handiagoan jar ditzakeen medikazioa dutenekin.
"Estrategia ari gara diseinatzen, Euskadin dagoen immunitatearen mapa egin ahal izateko; horretarako hainbat gizatalderi egingo dizkiegu testak", esan du. "Egunero eta modu masiboan egitea ez da posible, baina aztertu ahal dugu immunitatea nolakoa den".
