Beste lau pertsona hil dira Gipuzkoako adinekoen egoitzetan eta bat Arabakoetan

Pandemia hasi zenetik, guztira 134 pertsona hil dira Arabako adinekoen egoitzetan koronabirusean positibo eman ostean. Izan ere, apirilaren 18an heriotza bat gehiago izan zen, datuak eman diren azken egunean.

Arabako Foru Aldundiak astelehen honetan jakitera eman duenez, azken heriotza hau martxoaren 31tik izan den egun bakarreko heriotza kopururik txikiena da.

Aurreko balantzeari dagokionez, kutsatutako pertsonen kopuru bera mantendu da, 356, eta 66 egoiliar osatu dira jada gaixotasunetik.

Hildako erabiltzaileetatik 73 zentro pribatuetan bizi ziren, 59 foru egoitzetan eta gainerako biak lurraldeko udal ekipamenduetan.

Kutsatutakoei dagokienez, zentroak arduratzen dira gehienak artatzeaz, 337. Ospitaleetara, berriz, 19 gaixo bideratu dituzte.

Kasu positibo guztietatik, 207 Araban dauden zentro pribatuen erabiltzaileak dira, 140 foru-egoitzetan bizi dira, eta gainerako 9ak udal-baliabideetan.

Gipuzkoan, azken orduetan lau pertsona hil dira COVID-19aren ondorioz, eta guztira 141 pertsona hil dira adinekoen egoitzetan. Beste hiru erabiltzailek, berriz, positibo eman dute, eta batek gaixotasuna gainditu du.

Eider Mendoza Gipuzkoako Foru Aldundiko bozeramaileak jakinarazi duenez, gaur arte 103 egoiliar sendatu dira, 141 hil dira eta 274k diagnostiko positiboa dute.

Gaixoetatik 42 Donostiako Gurutze Gorrian daude, eta 34 ospitalean, Mendozak zehaztu duenez.

16 dira foru-sarean kasu positiboak dituzten adinekoen egoitzak. Guztira, 5.425 pertsona artatzen dituzten 65 zentro daude.

Garbiketa eta desinfekzioak lau egunetik behin egiten dira egoitzetan, suhiltzaileen, DYAko boluntarioen eta logeletarako enpresa espezializatu baten eskutik.