Euskadiko hirietako airearen kutsadura % 50 jaitsi da alarma egoeran

Ekologistak Martxan taldeak egindako txostenak adierazten duenez, koronabirusaren pandemiaren eraginez indarrean sartu zen alarma egoera hasi zenetik (martxoak 14) apirilaren 30era arte, airearen kutsadura % 50 murriztu da batez beste, Euskadiko hirietan.

Euskadin, batez beste % 50 murriztu da airean dagoen nitrogeno dioxidoa (NO2). Gasteizen % 58 murriztu da, Donostian % 49 eta Bilbon %46. Nitrogeno dioxidoa automobilen ihes-hodiek igortzen duten kutsatzaile nagusia da. Horregatik, bere bilakaera zuzenean lotuta dago motordun trafikoaren emisioekin, hori baita hirietako iturri nagusia eta hirietako airearen kalitatean eragiten duen faktore nagusia.

"Hirietako airearen kutsadura murrizteko tresnarik onenak motordun trafikoaren murrizketa eta mugikortasun-jarraibideen aldaketak direla erakutsi du COVID19aren krisiak, muturreko egoera hau salbuespena dela kontuan izan behar den arren", adierazi du Ekologistak Martxan elkarteak.

Ekologistak Martxanen iritziz, oinezko eta bizikleten mugikortasun aktiboa sustatu behar da berehala, garraiobide horietarako leku gehiago utziz eta hiriko abiadura muga orduko 30 kilometroan ezarriz. Garraio publikoa funtsezkoa da hiri-mugikortasunerako; beraz, haren bideragarritasuna bermatu behar da finantzaketa-lege baten bidez. Behin krisia gaindituta, asmo handiko emisio gutxiko eremuak ezarri beharko lirateke hirietan.