Ertzaintzaren eta Udaltzaingoaren LEPa abuztua baino lehen egitea aurreikusi dute

Eusko Jaurlaritzako Segurtasun Sailak Ertzaintzaren eta Udaltzaingoaren hautaketa-prozesuko lehen probak abuztua baino lehen egitea aurreikusi du. Guztira, 810 plaza eskainiko dira eta 6.000 hautagaik eman dute izena.

Polizia eta Larrialdietako Euskal Akademiako Kontseilu Errektoreak, Segurtasuneko sailburu Estefanía Beltrán de Heredia buru zela egindako bilkura berezian, jarduerak berriz hastea erabaki du. Jarduera horiek martxoaren 10ean eten ziren, pandemiaren ondorioz.

Gainera, Kontseiluak honako erabaki hauek hartu ditu: erakunde Autonomoaren Zuzendaritza Nagusiak alarma-egoera adierazi zenetik egindako jarduerak baliozkotzea, Ertzaintzaren 28. promozioaren eta Udaltzaingoaren Hirugarren Deialdi Bateratuaren ikasketa-planak prestakuntza-jarduerak etetera egokitzea, eta 2020an garatu beharreko jardueren egutegia aldatzea.

Eusko Jaurlaritzako Segurtasun Sailak jakinarazi duenez, Udaltzaingoko laguntzaileen lan poltsako kideak izango dira astelehenean, maiatzaren 18an, Akademiako prestakuntzara bertaratzen lehenak, eta 80 bat laguneko hiru txandatan sartuko dira, hiru egun jarraian taldeka, eta, aurreikuspenen arabera, hiru astean 200 edo 240 pertsona inguru egon daitezke EAEko udalen eskura poltsa horretan.

Maiatzaren amaieran, Udaltzaingoko bitarteko agenteen poltsa osatzen dutenen online prestakuntzaren azterketa ebaluatzailea egingo da.