Gizartea -
Koronabirusa
Koronabirusean positibo eman duen lehen katua atzeman dute Espainian
Adituen arabera, katuak infekzioarekiko sentikorrak diren animalia-espezieetako bat dira, eta, ondorioz, etxean oinarrizko higiene-neurriak zorroztea gomendatzen da.
Agentziak | Erredakzioa
Kataluniako Animalien Osasunari buruzko Ikerketa Zentroko (CReSA, katalanez) ikertzaileek koronabirusean positibo eman duen lehen katua atzeman dute Espainian. 'Negrito' zuen izena, eta COVID-19arekin kutsatutako seigarren katua da mundu osoan. Koronabirusarekin kutsatutako familia batekin bizi zen, eta bihotzeko gaixotasun bat zuen. Katua, gaitzaren eraginez hil da.
Joaquim Segales zentro horretako ikertzaileak azaldu duenez, "pertsonek katuei transmititzen diete birusa, baina momentuz ez dago ebidentziarik alderantziz ere gertatzen dela esateko".
Bestalde, Natalia Majo CReSAko zuzendari eta UABeko irakaslearen esanetan, litekeena da "kutsatutako pertsonekin kontaktu estua duten animalia batzuk kutsatuta egotea".
Orain arte argitaratu diren ikerketen arabera, katuak infekzioarekiko sentikorrak diren animalia-espezieetako bat dira, hudoak, bisoiak, hamsterrak, gizakiak ez diren primateak eta, neurri txikiagoan, txakurrak bezala.
Hori dela eta, koronabirusarekin kutsatutako pertsonek etxean oinarrizko higiene-neurriak zorroztea gomendatzen dute adituek, adibidez, eskuak animaliekin kontaktuan egon aurretik eta ondoren garbitzea, edo janaria ematean kontuz izatea.
