Donostiak bizikleta publikoko egungo zerbitzua bertan behera utzi du

Donostiako Udalak iragarri du dBiziko egungo zerbitzua, alegia, Bonoparkek eskainitako bizikleta publikoko zerbitzua, bertan behera utzi behar izan duela, "koronabirusaren krisiak sortutako administrazio-egoeragatik, eta krisi horrek sortutako ondorioengatik". Udalak ordaina emango die harpidedun guztiei.

Azaldu duenez, esleipen berrian izandako atzerapenagatik, eta zerbitzuaren ohiko funtzionamendurako exijitutako garbitasun-neurri zorrotzengatik, "ezinezkoa da, dBiziren hasieratik zerbitzua eman duen enpresarentzat, zerbitzu hori ematen jarraitzea".

Gipuzkoako hiriburuko Udalak martxoaren 30ean utzi zuen bertan behera dBizi bizikleta publikoko zerbitzua, egiaztatuta "ez zegoela ziurtatzerik COVID-19 gaitzak eragindako alarma-egoeragatik proposatu zituzten osasun-neurriak betetzea".

Egoera honek bat egin du denboran kontratu berriaren esleipenaren administrazio-prozesuarekin. Udalak eta aurreko enpresa esleipendunak adostu zuten kontratua behin-behinean luzatzea, zerbitzu berria esleitu eta ezarri arte; hala, ez zen etenaldirik izango zerbitzuan.

Alarma-egoerako dekretuak, baina, kontratu berriaren administrazio-tramitazioa zaildu du; beraz, esleipen berrirako aurreikusitako epeak ezin izan dituzte bete. Gainera, "bizikleten eta piezen horniduran ere zailtasun logistikoak izan dira", eta, ondorioz, abian jartzeko epeak luzatu eta atzeratu egin dira.

Zerbitzua bertan behera geratu dela kontuan izanik, eta berrio aktibatu arte, egungo sistemako harpidedunek ordaina jasoko dute; hain zuzen ere, urteko abonamendutik, zerbitzurik gabeko epea kenduko dute, hau da, 2020ko martxoaren 30etik abonamenduaren amaierako datara arte. Aurki jakinaraziko dute dirua nola itzuliko duten.