Emakume bat zauritu da Nafarroan, Lakora tontorretik behera jausita

59 urteko emakume frantziar bat larri zauritu da gaur arratsaldean mendian izandako ezbehar baten ondorioz. Lakora tontorretik (Belaguan) hogei metro behera jausi da. Nafarroako Gobernuak adierazi duenez, 112-SOS Navarrak dei bat jaso du, istripuaren berri emanez. Zaurituaren lagunek eman dute abisua, antza.

Nabaskozeko suhiltzaileak, Isabako mediku talde bat eta Nafarroako Gobernuaren helikoptero bat koordinatu ditu SOS Navarrak emakumezkoa erreskatatzera joan zitezen. Guardia Zibilaren mendi-taldea (GREIM) ere bertaratu da, baita Erronkariko agenteak eta helikoptero medikalizatu bat ere. 16:30ak aldera erreskatatu dute, eta helikopteroz eraman dute Nafarroako Ospitalera.