Alvia bat errailetik irten da Zamoran, ibilgailu bat harrapatuta, bi hildakorekin

Ferrol-Madril ibilbidea egiten duen Alvia tren bateko tren-makina bat errailetik irten da Hiniesta udalerrian, Zamoran, ibilgailu bat harrapatuta. Ibilgailuko gidaria eta tren-gidarietako bat hil dira, eta trenean zihoazen bidaiariak onik irten dira, baina beste tren-gidaria zaurituta dago, EFEri Renfeko eta Espainiako Gobernuak Gaztela eta Leonen duen Ordezkaritzako iturriek zehaztu diotenez.

Gertakaria 16:11n jazo da. Orduan, ibilgailua, lur orotako ibilgailu bat, gainbide batetik erori da trenbidera, eta Alviak aurretik eraman du.

Lur orotako gidaria hil da, eta tren-makinako bi tren-gidarietako bat ere bai.

Treneko bidaiari guztiak onik irten dira; Renferen esanetan, 155 dira, baina Espainiako Gobernuak Zamoran duen Ordezkaritzak dio 174 direla. Sei Virgen de la Concha Ospitalera eraman dituzte, arin minduta (kolpe zerbikalak eta antsietatea izan dituzte), Espainiako Gobernuaren Gaztela eta Leongo Ordezkaritzaren hitzetan.

Gaztela eta Leongo 112ak esan duenez, bagoiak zutik geratu dira, eta bidaiariak euren kabuz atera dira.

112ko operazio-aretoak Guardia Zibila, Zamorako suhiltzaileak, eta Sacyl Osasun Larrialdiak abisatu ditu. Guztira, bi helikoptero, bi anbulantzia eta Zaintza Intentsiboetako Unitate mugikor bat bertaratu dira.