COVID-19ak zazpi heriotza eragin ditu EAEn eta batere ez Nafarroan

Koronabirusak eragindako pandemiaren ondorioz, zazpi pertsona hil dira Euskal Autonomia Erkidegoan (EAE) azken 24 orduetan; beraz, 1.571 hildako izan dira jada. Horrez gain, lau kasu berri baieztatu dira PCR proben bidez, Eusko Jaurlaritzako Osasun Sailak larunbat honetan emandako datuen arabera (ostiraleko 24:00ak arte bildutakoak).

Horrela, datuek koronabirusak eragindako pandemiaren bilakaera beheranzko joera izaten ari dela erakusten dutela adierazi du Nekane Murga sailburuak. Osasun Sailak jakitera eman duenez, gaitza atzemateko 4.009 proba egin zituzten atzo: 2.708 PCR eta 1.301 test serologiko.

Azken orduetan, lau kasu atzeman dituzte EAEn PCR proben bidez (13.541 positibo guztira) eta 61 test serologikoen bidez (6.576), Eusko Jaurlaritzaren arabera; beraz, 20.117 kasu baieztatu dira orain arte. 

Datuak lurraldez lurralde ikusita, Araban pertsona batek eman dute positibo PCR probetan (3.019 guztira), eta Bizkaian ere beste hiru kasu atzeman dituzte (7.620 guztira). Gipuzkoan, ordea, ez dute kasu berririk atzeman azken lau egunetan (2.313 guztira).

Araban baieztatutako kasuari dagokienez, Gasteizen (1) atzeman dute. Bizkaian, berriz, Alonsotegin (1), Bilbon (1) eta Busturian (1) bizi dira kutsatu berriak.

Eusko Jaurlaritzaren arabera, azken 24 orduetan 70 pertsona sendatu dira (16.923 guztira). Bestalde, EAEn kutsatzeen indizea batetik beherakoa da (0,72). Zehazki, kutsatu bakar batek batez beste zenbat pertsona kutsa ditzakeen adierazten du horrek.

Bestalde, koronabirusaren eraginez zainketa intentsiboetako unitatean artatu behar izan dituzten pertsonen kopuruak behera egin du; izan ere, atzo zabaldutako datuekin alderatuta, lau paziente gutxiago daude: 17 pertsona. Azken orduetan, pertsona bat ospitaleratu dute COVID-19agatik.

Une honetan 1.628 gaixo daude oraindik (% 8,1), gehienak etxean.

Nekane Murga sailburuak eskerrak eman dizkie osasun langileei egindako lanagatik eta datuak ikusita, logikoa dela EAE 3 fasera sartzea esan du. Fase honetan "kontziliazio neurriak bultzatuko" dituztela adierazi du eta herritarrei birusak hor jarraitzen duela eta segurtasun zein higiene neurriei eusteko eskatu die.

Bestalde, hildako kopuruari dagokionez, Eusko Jaurlaritza eta Espainiako Gobernua azken aste honetan kopuru ezberdina zergatik ematen ari diren azaldu du Murga sailburuak. Hemen bideoa (gaztelaniaz):

Hamar positibo berri izan dira Nafarroa, baina hildakorik ez

Azken orduetan, PCR frogekin baieztatutako COVID-19 kasuen kopuruak gora egin du Nafarroan: 10 kasu berri atzeman dituzte, eta guztira, 5.326 dira pandemia hasi zenetik.

Hildakoen kopurua, berriz, 515ean mantentzen da, ez baita heriotzarik izan azken orduotan, aurreko 7 egunean bezala.

Nafarroako Gobernuak emandako datuen arabera, beste hiru lagunek ospitaleko senda-agiria jaso dute, eta batek ZIU utzi du; beraz, bederatzi dira egun zainketa intentsiboetan dauden pertsonak.

54 pertsona daude ospitalean, horietatik 42 plantan, hiru etxean eta beste bederatziak ZIUn.

Espainiak hildako bat eta 164 kasu berri jakinarazi ditu

Espainiako Osasun Ministerioak beste hildako baten berri eman du larunbat honetan, hildakoen kopurua 27.135ean utziz. Dena dela, azken astean izandako heriotzak 52tik 67ra igo ditu.

PCR bidez azken 24 orduan baieztatutako kasuak, berriz, 177tik 164ra jaitsi dira, eta, pandemia hasi zenetik 241.310 kasu atzeman dira jada. Positibo berrien ia erdiak Madrilen izan dira (84), Katalunian 24, Aragoin 12, Valentzian 11, Nafarroan 10 eta Andaluzian 8.

Azken datuen arabera, azken astean hildako gehien izan dituen erkidegoa Madril izan da (24), eta ondoren Gaztela eta Leon (16) eta Asturias (11) daude.

Zazpi egun horietan 1.966 positibo berri zenbatu dira, ostiralean baino 211 gehiago; gehienak Madrilen (674) eta Katalunian (529); hala, metatutako intzidentzia-tasa (100.000 biztanleko diagnostikatutako kasuak) 4,18koa da, baina alde handiak daude autonomien artean.

Azken 14 egunei erreparatuz gero, 5.292 kutsatze baieztatu dira, 263 gutxiago, eta horrek Espainiako guztirako intzidentzia-tasa 11,25 murriztu du.

Hala ere, Osasun Ministerioarentzat adierazle fidagarriena azken 7 egunetan sintomak hasi dituztela baieztatutakoena da: 265 izan dira, eta atzo, berriz, 249. Kopuru hori 989ra igo da azken bi asteak kontuan hartuz gero.