Bikote bat atxilotu dute Gasteizen, emakumeen trafiko delitu bat egotzita

Nigeriako bikote bat atxilotu dute Gasteizen, bere herrikideak sexualki esplotatzea eta erakunde kriminal bateko kide izatea egotzita. Erakunde horrek gutxienez zazpi urte zeramatzan prostituzio behartuaren bidez diru-kopuru handiak biltzen.

Poliziaren Zuzendaritza Nagusiak jakinarazi duenez, Espainiako Poliziaren Atzerritarren eta Mugen Brigada Probintzialeko kideek atxilotu zituzten, joan den asteazkenean, Gasteizen.

Ikerketa Valentzian hasi zen, emakume nigeriar batek salaketa jarri ostean; izan ere, herrikide talde bat emakumeen trafikoa egiten ari zela adierazi zuen.

Biktimaren arabera, gertakariak 2013an hasi ziren, engainu bidez bere herrialdean harrapatu eta Italiara eraman zutenean, eta handik Castelloko etxebizitza batera eraman zuten, betiere erakundeko kontrolatzaile batek zainduta.

Pisu horretan, hiru astez egon zen giltzapetuta, harik eta hiri bereko beste apartamentu batera behin betiko eraman zuten arte; atxilotuak ere bizi ziren bertan.

Biktimak ikertzaileei adierazi zien duela astebete hasi zela budu erritu baten bidez heriotza mehatxua jasaten, Castellon bide publikoan prostituzioan aritzeari uko egin zionean.

Halaber, agenteei azaldu zienez, esplotatzaileak Gasteizera bizitzera joan zirenean haren gaineko kontrola izaten jarraitu zuten, eta aldian-aldian Castellora joaten ziren, berak eta egoera berean zeuden beste neska batzuek sortzen zuten dirua jasotzera.

Bertaratzeko modurik izan ezean, berak egiten zituen banku-sarrerak ustiatzailearen kontuan.

Aitorpena entzundakoan, agenteek Gizakien Trafikoaren Biktimak Babesteko Esparru Protokoloa aplikatu zuten, eta beharrezko babesa eman zioten lekuko babestu gisa.

Ondoren, atxilotuaren banku-kontuan beste emakume batzuek egindako hainbat diru-sarrera zeudela egiaztatu zuten, erakunde kriminal horretako beste biktima batzuen zorraren ordainketak omen zirenak.

Lekuko babestuak prostituzioan jardun zuen denboran 50.000 euro eman zizkien esplotatzaileei, baina haiek beste 10.000 euro eskatzen zizkioten zor gisa, Italiara lehenengo eta Espainiara gero eramateko sortutako gastuen truke.

Asteazkenean, akusatuak bizi ziren Gasteizko etxebizitza aurkitu ostean, atxilotu egin zituzten. 49 urteko gizon bat eta 41 urteko emakume bat dira atxilotuak, eta Gasteizko Guardiako Epaitegiaren esku utzi zituzten.

Operazioa Castelloko Instrukzioko 1 zenbakiko Epaitegiak bideratu du, eta zabalik dago oraindik, erakundeko gainerako kideak aurkitu eta atxilotu arte.